Bu bulaq necə də sərindi nənə,
Suyu şəkər kimi şirindi, nənə.
Üzümə dağların havası dəydi –
Bizim “Ortabulaq” göründü, nənə.
Yaz yazı gətirər, söz sözü, nənə,
Dağ dağı səsləyər, düz düzü, nənə.
Qırxbulaq gözəldi, mən hardan alım
Baxıb oxşamağa qırx gözü, nənə.
Bu çeşmə burula-burula, nənə,
Sorağı sorula-sorula, nənə,
Mən ki, su içmişəm “Quyubulaq”dan,
Axaram durula-durula, nənə.
Bu görünən bulaq “Yazılı”, nənə,
Yazı düzüm-düzüm düzülü, nənə.
Ürəkdə bir arzum, bir diləyim var,
Bulaqda qarşıla yüz ili, nənə!
1981
