Sənə həsr etsəm də bütün şeirimi,
Darvazım, borcunu verə bilmərəm.
Sənə qul etmişəm sevən qəlbimi,
Səndən qeyri məkan sevə bilmərəm.
Doğma qucağında keçib gəncliyim,
Müqəddəs Vətənim, xanımanımsan.
Sənsiz bircə an da olmaz dincliyim,
Son ümid yerimsən, son gümanımsan.
Borçalı üzüksə - onun qaşısan,
Söyləyin, üzüksüz qaş kimə lazım?
Atamın, babamın ömür yaşısan,
Mənasız ömür-gün, yaş kimə lazım?
Sənin hünərindən cahan danışır,
Oxşarsan ulduzlu asimana sən.
Hərdən göylərindən ulduz sayrışır,
Hərdən bürünürsən çən, dumana sən.