Bax Şindinin zirvəsinə,
Bulud enir sinə-sinə.
Beşik qurub dağlar sənə,
Bu nə duman, bu nə çəndi,
Darvaz kəndi?
Bir məlhəmdir suyun, havan,
Gözlərimdə söküldü dan.
İçdim Quyubulağından,
Vücuduma nur ələndi,
Darvaz kəndi.
Qonaq gəldim mən bu yurda,
Gözüm qaldı boyalarda.
Axşamüstü qayalarda,
Turac susdu, kəklik dindi,
Darvaz kəndi.
Bir cənnətdir bu yastana,
Şer yazım, düş dastana.
Bir qapısan Gürcüstana,
Kəs bərəni, kəs bu bəndi,
Darvaz kəndi.
Elə bəndsən Borçalıya,
Bir kəməndsən Borçalıya.
Əzəmətsən Borçalıya,
Vətən həmən, el həməndi,
Darvaz kəndi.
Haqqa gedən yolun olum,
Zərin, axçan, pulun olum.
Qul deyərsən qulun olum,
Al boynuma sal kəməndi,
Darvaz kəndi.
Pərvanələr oda düşdü,
Dərd sinəmdən cida düşdü.
Ulu Göyçəm yada düşdü,
Köhnə dərdim təzələndi,
Darvaz kəndi.
Yaşıl meşə, soyuq bulaq,
Bu hikmətə dön.birdə bax.
Mətin yeri, söykəyin dağ,
Bu səcdəyə Günəş endi,
Darvaz kəndi.
Gecə yarı söndü işıq,
Başdan gəlir bu dolaşıq.
Səhrədlə mən yatmamışıq,
Neçə sağlıq təzləndi,
Darvaz kəndi.
Alqayıdam, hər yan Vətən,
Danışmayım, susum nədən.
Qardaş olduq Fərhadla mən,
Bir oğlun da mənəm indi,
Darvaz kəndi.
