Asiman içində bir asimansan,
Ey mənim günəşli, aylı Darvazım,
Qayalı dağların göyə əl verir,
Çəmənli, meşəli, çaylı Darvazım.
Deyirəm dünyanın mərkəzi sənsən,
Borçalı elinin əzizi sənsən,
Keçmiş tarixlərin xoş sözü sənsən,
Hər zaman hörmətli, saylı Darvazım.
Qışın bərəkətdir yağan qarıyla,
Sellər nəğmə deyər hay-harayıyla...
Baxçalar gülüylə, bağlar barıyla,
Baharlı, payızlı,yaylı Darvazım.
Zəhməti haqq bilən oğul, qızın var,
Dünyaya yayılmış çox ulduzun var,
Halal, bərəkətli çörək-duzun var,
Hər dosta, düşmənə paylı Darvazım.
