Nə söyülər, nə söyər,
Nə döyülər, nə döyər.
Həm öyülər, həm öyər,
Allahı sevən insan.
Sevməyər çirkin-yasar,
Vicdana qulaq asar,
Torpağa bağır basar,
Allahı sevən insan.
İlhamı coşqun dəniz,
Günəş nurlu, aybəniz,
Olar təmizdən-təmiz,
Allahı sevən insan.
Əl verənə əl tutar,
Qəlbi zikr ilə yaşar,
Kin-küdurəti atar,
Allahı sevən insan.
Olmaz bədbin, bəd nəzər,
Sözü dünyanı bəzər.
Nəfsini vurub əzər,
Allahı sevən insan.
Dağ tərpətsə, daş gələr,
Qəmli gözdən yaş gələr.
Allaha da xoş gələr,
Allahı sevən insan.
17.02.2008