Sən də yalqızlıqdan utanırsanmı,
Səfehləyirsənmi tənha qalanda?
Zümzümə eləyib, fit çalırsanmı
Huşuna əcaib sükut dolanda?
Huşuna əcaib sükut dolanda,
Gecə uzananda sabahsız kimi,
Rəzil bir xəyala ürcah olub da,
Qəfil tər basırmı səni buz kimi?
Qəfil xəcalətdən gizlənmək üçün
Nimdaş xatirənə küfr edirsənmi?
Qaçıb pəncərəyə...çölü bir anlıq
Dəli tək döyüküb seyr edirsənmi?
...Bəndə tək qalanda dəliyə dönür,
Rəzil düşüncələr cana daraşır.
Özünə yaradıb Tanrı təkliyi,
Tənhalıq Tanrıya yaman yaraşır...