Könüldə qəm adlı saraya baxdım,
İçində nə qədər gözəllər əsir.
Qocaman dünyatək genişdən geniş,
Arzular, diləklər gəzərlər əsir.
Tez düşər kim haqqı bəyənməyirsə,
Mərifət libasın geyinməyirsə.
Yazarlar sözünü deyəmməyirsə,
Qəlbində şeirlər, qəzəllər əsir.
İlahi, nə qədər əzizsən, əziz,
Gəlib, hüzuruna gəlib bəndəniz.
Gözlərim dumduru çəpərli dəniz,
Sonalar çırpınıb üzərlər əsir.
Qəlb yanmaz, əl yanar od əldədirsə,
Qovrular, alovu könüldədirsə.
Balalı yuvası yad əldədirsə,
Qartallar səmada süzərlər əsir.
Təbriz, döz, üstündə Tanrı durubsa,
Yorulma, ruhunu hicran yorubsa.
Zəmanə bəxtinə kilid vurubsa,
Milyonlar hıçqırıb dözərlər əsir.
