Gör necə vurur yenə ürəyim tarap-turup,
Heç uyuya bilmirəm ürəyimin səsindən.
Elə qəzəblənmişəm, qanım beynimə vurub,
İlahi, hara qaçım mən bu yer kürəsindən.
Bir dinin ətrafında birləşməyir dinlərim,
Parçalayır içimi nifrətlərim, kinlərim.
Yüz yol bismillah dedim, qeyb olmayır cinlərim,
Qorxmayır iblis ruhlum Tanrının surəsindən.
Boylanıram göylərə, əl üzdə artırmadan,
Keçmir bir anım belə ürəyimi qırmadan.
Hər dəqiqə bir yerim yaralanır durmadan,
Vaxt salamat buraxmır ovunu bərəsindən.
Bəzən düşünürəm ki, nə karəyəm, mən kiməm,
Ya ağıldan-şüurdan, ya da bəxtimnən kəməm.
Namus-ar məhbusuyam, mənliyimə hakiməm,
Gərək şövqlə tullanam iftixar dərəsindən.
Ələmlərə, qəmlərə sığıncaq olub köşəm,
Nadan tolamazıyla çiliklənir can şüşəm.
Öz hissinə qapılmış bir yaralı dərvişəm,
Səsim Allaha yetmir, məzlum məqbərəsindən.
Təbriz, dua et, eşqin, məhəbbətin solmasın,
Xəyalların zarıyıb saçlarını yolmasın.
Canan vəfasız olsa, haqqım halal olmasın,
Ah çəksəm, göylər düşər ruhumun nərəsindən.
25.03.2013
