Bax, ey könül, bax, dil deyir,
Veribdi baş-başa dağlar.
Ölənlərə diril deyir,
Yaşa deyir, yaşa, dağlar.
Zirvəsində çəni küskün,
Tellərində dəni küskün,
Nə vaxt görsə məni küskün,
Ağlar coşa-coşa dağlar.
Sevdalınam, qəlbim xəstə,
Əcəl bir gün durar qəsdə.
Kök atıb köksünün üstə,
Dönəm bir sal daşa, dağlar.
Dərd doğmamdır, deməm əyil,
Dolansam da veyil-veyil.
Ruhum, canım azad deyil,
Ömür keçir boşa, dağlar.
Hər halımı sözə dedim,
Düzü sevdim, düzə dedim.
Nə dedimsə, üzə dedim,
Heç gəlmədim xoşa, dağlar.
Gözəllərin xası dünya,
Yaman sevir yası dünya.
Dünya, dağılası dünya,
Haşa səndən, haşa, dağlar.
11.04.2013
