Küsər bağlar, gül açmaz,
Şair yaddan çıxanda.
Günəş də şəfəq saçmaz,
Şair yaddan çıxanda.
Budaqlar bar saxlamaz,
Yaralar qaysaqlamaz.
Dağlar da qar saxlamaz,
Şair yaddan çıxanda.
Dönər ruhun pərəni,
Qəmdi yuyub sərəni.
Sınar damın kərəni,
Şair yaddan çıxanda.
Ah sevincə şah olar,
Ümid quru ah olar.
Savab da günah olar,
Şair yaddan çıxanda.
Xəyallar baş aparar,
Gözləri yaş aparar.
Düz qoyar, çaş aparar,
Şair yaddan çıxanda.
Tarix susar, il ağlar,
Bəm sızıldar, zil ağlar,
Ağlar, ana dil ağlar,
Şair yaddan çıxanda.
05.02.2011
