Ey könül, cismimi doğrama hələ,
Zaman əllərində şiş gətirməmiş!
Mənim bəxt ulduzum gülərmi, gülə?
Taleyin nərdində şeş gətirməmiş.
Dünya kimlərindi, kimə qalası,
Köçüb ağuşundan neçə balası.
Ruhum kövrələrmi, zalım balası,
Qəlbin aynasına yaş gətirməmiş!
Qızılgül tez solur, dərin, iyləyin,
Yaxşının dalınca yaxşı söyləyin.
Ey sözü sevənlər, əlac eyləyin,
Ələm damağımda diş gətirməmiş.
Təbriz türk oğludur, türkdəndir geni,
Mən ki bu gövdədə yeniyəm, yeni.
Alın pəncəsindən, qoruyun məni,
Ruzigar başıma iş gətirməmiş.
15.02.2011
