Məni təbiətdən ayırma, nolar,
Təbiət qoynunda məni yaradan.
Gözlərim gecə də mehmanı olar,
Sənsən hər yörəni, yönü yaradan.
Yamacına baxdım, yalını sevdim,
Çiçəyinə baxdım, xalını sevdim.
Pətəyini sevdim, balını sevdim,
Arının köşkündə balı yaradan.
Daşın da qəlbi var, daş düşünürsə,
Gözlər necə gülsün, yaş düşünürsə,
Saçın nə günahı, baş düşünürsə,
Ey qara saçlarda dəni yaradan.