Necə qoyub gedim kəndi,
Bulaqlar çağlamaz mənsiz.
Perik salar el-obanı,
Qoynunda saxlamaz mənsiz.
Könül, köklə zili, bəmi,
Gəlib oxumağın dəmi.
Çəkilər döşlərin nəmi,
Qayalar ağlamaz mənsiz.
Gedərəmmi bilə-bilə,
Etibar yox aya, ilə.
Bülbüllər bağ-bağat ilə,
Əhd-peyman bağlamaz mənsiz.
Haqq aşiqi Təbriz İman,
Murad alar Haqdan uman.
Dərələrdə yatan duman,
Dağları yoxlamaz mənsiz.
24.03.2011