Yenə bahar gəldi, gəlirsən cana,
Mənim yaşılbaşlı sonam, təbiət.
Girirsən yamyaşıl təzəcə dona,
Göyərir daşlarda xınam, təbiət.
Bulaqların üçün ölənin mənəm,
Çəmənində deyib-gülənin mənəm.
Sənin öz dilin var, bilənin mənəm,
Sənsiz mən heç kiməm, anam təbiət.
Buludtək qaralıb gecə yağıram,
Ruhumu vərəqlər üstə sağıram.
Qəriblikdə boynubükük fağıram,
Sənin qucağında xanam, təbiət.
Güllərin üstündə dilənir arı,
Qayıdır axşamlar şanına sarı.
Qayıtmam, neynirəm dövləti, varı,
Doğma ev-eşiyim, binam təbiət.
Çəmən-çöl Təbrizi düz yola çəkir,
Dumanlı başımdan dağılır fikir.
Odumun üstünə göz yaşı tökür,
Qoymayır alışıb yanam təbiət.
24.03.2011
