Anam Darvaz, sonam Darvaz,
Necə qoyub gedim səni.
Ağuşunda xanam, Darvaz,
Necə qoyub gedim səni.
Dosta, yada ver fikir sən,
Yollarıma zər səpirsən.
Hər nazımı sən çəkirsən,
Necə qoyub gedim səni.
Vücudumda saf qanımsan,
Ürəyimsən, həm canımsan.
Namusumsan, vicdanımsan,
Necə qoyub gedim səni.
Getsəm, bağça-bağ ağlayar,
Getsəm, qarlı dağ ağlayar.
Ruhu, qəlbi sağ ağlayar,
Necə qoyub gedim səni.
Qəmlə dolar can otağım,
Ağı deyər dil-dodağım.
Qurumazmı əl-ayağım,
Necə qoyub gedim səni.
Ən dürüstüm, ən həqiqim,
Xəstən mənəm, ey təbibim.
Ay etibarlı rəfiqim,
Necə qoyub gedim səni.
29.06.2011
