Bilmirəm xeyirmi, yoxsa şərdimi,
Gecələr yuxumda uçuram, Allah.
Həsrətlə boylanıb göyə-günəşə,
Altun şəfəqləri qucuram, Allah.
Bəşərin halını dəyişir pul, taxt,
Cahana hakimdir şər zaman, şər vaxt.
İçimi imanla doldurub hər vaxt,
Ətrafa qəm-kədər saçıram, Allah.
Nədən müsəlmanlar qanlı don geyir,
Vuruşdan, savaşdan yad görür xeyir.
Ruhum cəsədimi gəmirib yeyir,
Vətən yanğısıyla acıram, Allah.
Əridim hicrandan, düşdüm nər kimi,
Öldür öldürəndə mömünlər kimi.
Xəyallar qoynunda qəriblər kimi,
Elə, eldən elə köçürəm, Allah.
Təbrizi sevməyən huşsuz əfəl ki,
Duyana təbiət gövhər ki, ləl ki,
Özüm də insanam, özüm də, gəl ki,
Niyə insanlardan qaçıram, Allah.
26.08.2011
