Dönüb, qayıdıram ziyarətindən,
Kaş bir də həmdəmim ola Borçalı!
Şirin söhbətindən doya bilmədim,
Qonaq eyləmişdi bala, Borçalı.
Bulaqlar qoynunda zümzüməsidi,
Vüqar zirvəsində qartal səsidi.
Hər qaya bir tarix kitabəsidi,
Gərək verdiyini ala Borçalı...
Neçə qəhrəmanlar olub fədası...
Yenə yerindədi nazı-ədası.
Qalıb divarında nə'rə sədası,
Qeyrətdən tikilmiş qala Borçalı.
Uzadır ömrünü, ömür eyləyir,
Alovdan çıxarır, kömür eyləyir.
Cana dözüm verir, dəmir eyləyir,
Tükənməz güc verir cana Borçalı.
Dünyanın rəngləri tökülüb üstə...
Boynu Bənövşənin bükülüb üstə.
Cənnətin şəkili çəkilib üstə,
Baxanda, hər yanı Lala Borçalı.
Mehmanı olasan, yetməz söz ilə,
Sevən ürək ilə, görən göz ilə!...
Dərin hörmət ilə, gülər üz ilə,
Saldı QAFQAZLInı yola Borçalı.
