M.Məmmədov əmək fəaliyyətinə Bakıdakı 190 saylı orta məktəbdə müəllim kimi başlamış, sonralar indiki Tofiq İsmayılov adına Uşaq-Gənclər Yaradıcılıq Sarayında metodist, şöbə müdiri olmuş, Xarici Dillər İnstitutunda dekan müavini vəzifəsində çalışmışdır.

1968-ci ildən onun həyat və fəaliyyəti Gəncə şəhəri ilə bağlı olmuşdur. O, müsabiqə yolu ilə Gəncə Pedaqoji İnstitutunun xarici dillər kafedrasına müəllim götürülmüş, sonra müstəqil fəaliyyət göstərən rus-dili kafedrasının baş müəllimi, dosenti olmuşdur.

O, 1970-ci ildə “M.Qorki və Azərbaycan dramaturgiyası” mövzusunda namizədlik dissertasiyası müdafiə etmiş, respublikanın dövri mətbuatında elmi-publisistik, ədəbi-bədii yaradıcılıq nümunələri ilə müntəzəm çıxış etmişdir. 330-dan çox elmi-publisistik məqalənin, Azərbaycanda ilk dəfə nəşr olunmuş “İşgüzar rəsmi sənədlərin hazırlanması nümunələri” kitabının müəllifidir.

M.Məmmədov respublikanın tanınmış jurnalistlərindən biri idi. Uzun illər “Azərbaycan gəncləri” qəzetinin redaksiyası ilə əməkdaşlıq etmiş, həmin qəzetin Gəncə bölgəsi üzrə xüsusi müxbiri olmuşdur.

Ömrünün sonunadək N.Zərdabi adına Gəncə Pedaqoji İnstitutunun “Rus və xarici dillər” kafedrasında dosent kimi fəaliyyət göstərən Murtuz Məmmədov “1900-1912-ci illərdə dövri mətbuatda ədəbi tənqid məsələləri” mövzusunda doktorluq dissertasiyasının müdafiəyə hazır olduğu bir vaxtda – 1988-ci ildə vəfat etmişdir.