Mədəd Namaz oğlu Çobanov 1937-ci ildə Lüksemburq (indiki Bolnisi) rayonunun Darvaz kəndində anadan olub. 1955-ci ildə orta məktəbi və 1960-cı ildə Tiflis Dövlət Pedaqoji İnstitutunun tarix-filologiya fakültəsini bitirib. Bir müddət Bolnisi Rayon Komsomol və Rayon Partiya Komitəsində təlimatçı işləmişdir.1970-1993-cü illərdə TDPİ-nun Azərbaycan dili və ədəbiyyatı kafedrasında elmi-pedaqoji fəaliyyətlə məşğul olub. 1973-cü ildə namizədlik və 1992-ci ildə doktorluq dissertasiyası müdafiə edib.
1994-1995-ci illərdə “Şimal” Universitetində dillər kafedrasının müdiri, 1995-1996-cı illərdə Azərbaycan Pedaqoji Kadrların İxtisasın Artırılması və Yenidən Hazırlanması Baş İnstitutunda Ali və Orta ixtisas təhsil məktəblərində professor-müəllim heyətinin ixtisasartırma fakültəsinin dekanı vəzifəsində çalışıb.
M.Çobanov 400-dən çox elmi əsərin, o cümlədən 40-dan çox kitabın, ali məktəblər üçün 20-dən çox proqramın və elmi məqalələrin müəllifidir. O, Azərbaycan dilçiliyində ilk dəfə olaraq “Mətnin linqvistik təhlili” fənninin proqramını və dərs vəsaitini hazırlayıb nəşr etdirmişdir. 50-dən çox beynəlxalq, keçmiş ittifaq və respublika səviyyəli elmi konfranslarda məruzələrlə çıxış edib.
1996-cı ildən Bakı Ali Hərbi Dənizçilik məktəbində “Dillər” kafedrasına başçılıq edib. İndi təqaüddədir.
