Zakir Məhəmməd oğlu Nəbizadə 1949-cu ildə Bolnisi rayonunun Darvaz kəndində anadan olub. 1966-cı ildə kənd orta məktəbini və 1972-ci ildə N.Nərimanov adına Azərbaycan Dövlət Tibb İnstitutunun (indiki Tibb Universiteti) müalicə-profilaktika fakültəsini bitirib. 1972-1974-cü illərdə ordu sıralarında həkim kimi xidmət edib. 1974-1977-ci illərdə Tetriskaro (Ağbulaq) rayon Mərkəzi xəstəxanasında cərrah, 1977-1978-ci illərdə Xarkov şəhərindəki Cərrahiyə İnstitutunda cərrah-ordinator kimi fəaliyyət göstərib. 1978-1982-ci illərdə Bolnisi rayon Mərkəzi xəstəxanasında cərrah-travmatoloq işləyib. 1983-1985-ci illərdə travmatologiya-ortopediya üzrə kliniki ordinaturanı bitirib. Ordinaturanı bitirdikdən sonra yenidən fəaliyyətini Bolnisi rayon Mərkəzi xəstəxanasında davam etdirib.1990-cı ildən Azərbaycan Elmi-Tədqiqat Travmatologiya və Ortopediya İnstitutunun plastik və mikrocərrahiyyə şöbəsində çalışır. 2001-ci ildən həmin şöbənin müdiridir.
Zakir Nəbizadənin övladları da onun yolunu davam etdirirlər. Belə ki, oğlu Rauf Azərbaycan Tibb Universitetini və ixtisası üzrə aspiranturanı bitirib, hazırda Tibb Universitetinin neyrocərrahiyyə kafedrasında və Respublika Neyrocərrahiyyə xəstəxanasında çalışır. Qızı Ülviyyə də Tibb Universitetini bitirib, hazırda Türkiyənin Egey Universitetində uzmanlıq dərəcəsi almaq üçün təhsilini davam etdirir.
