İkinci dünya müharibəsi başlayanda cəbhəyə yollanan İlyas Ramazan oğlu döyüşlərdə iki dəfə yaralansa da, müalicə olunaraq yenidən döyüş bölgəsinə qayıtmış, rəşadətlə vuruşmuşdur. Müharibədən tərxis olunduqdan sonra doğma yurda qayıdan İ.Əliyev Darvaz orta məktəbində dərs hissə müdiri vəzifəsinə təyin olunmuşdur.
Rayon ictimaiyyəti arasında böyük hörmət və nüfuz sahibi olan İlyas müəllim daim ictimai işlərdə fəallıq göstərmiş, dəfələrlə yerli sovetin deputatı seçilmişdir. O, iki dəfə (birinci dəfə 1952-ci ildə) Darvaz kənd sovetinin sədri seçilmiş, bu vəzifədə ləyaqətlə çalışaraq hemyerlilərinin etimadını doğrultmuş, kəndin abadlaşdırılması naminə əlindən gələni əsirgəməmişdir.
Sonralar bir müddət Darvaz kənd rabitə şöbəsinin rəisi vəzifəsində çalışan İ.Əliyev ötən əsrin altmışıncı illərinin sonlarında yenidən pedaqoji işə qayıdaraq Darvaz orta məktəbində gənc nəslin təlim-tərbiyəsi ilə məşğul olmuşdur.
Sözün əsl mənasında müəllim, el ağsaqqalı, nurani insan olan İlyas müəllim eloğlularının böyük rəğbətini qazanmışdır. Bu gün də onun adı minnətdarlıqla xatırlanır.
İlyas Əliyev 1997-ci ilin mart ayında vəfat etmişdir.