Alı Orduxanov 1945-ci ildə Darvaz orta məktəbində ibtidai sinif müəllimi kimi əmək fəaliyyətinə başlamış, 1954-cü ildən isə həmin məktəbdə pioner baş dəstə rəhbəri işləməklə yanaşı, həm də dərs demişdir. O, 1957-ci ildə Azərbaycan Dövlət Universitetinin tarix fakültəsinə daxil olmuş və 1963-cü ildə ali təhsilini başa vurmuşdur.
1960-1966-cı illərdə Darvaz orta məktəbində tarix fənnindən dərs deyən Alı müəllim 1966-cı ilin sentyabrından 1967-ci ilin mart ayınadək kənddəki axşam orta məktəbinin direktoru olmuş, sonra isə 1971-ci ilədək Darvaz orta məktəbində məktəbdənkənar və sinifdənxaric tərbiyə işləri üzrə direktor müavini vəzifəsində çalışmışdır. O, 1971-ci ildə həmin məktəbin diretkoru təyin edilmiş və bu vəzifədə 1981-ci ilədək çalışmışdır.
Alı Orduxanov 1981-1984-cü illərdə Darvaz kənd Sovetinin sədri, 1984-1986-cı illərdə isə yenidən Darvaz orta məktəbinin direktoru vəzifəsində çalışmışdır. 1986-cı ildə təqaüdə çıxması ilə əlaqədar öz xahişinə əsasən tutduğu vəzifədən azad olunmuşdur.
Yaşadığı kəndin və rayonun ictimai həyatında daim yaxından iştirak edən Alı müəllim uzun müddət Kənd Sovetinin deputatı olmuş, bacarıqlı maarif təşkilatçısı kimi fərqlənmişdir. Onun əməyi layiqincə qiymətləndirilmişdir. Dəfələrlə Fəxri Fərmanlara layiq görülmüş, “Rəşadətli Əməyə görə”, “Əmək veteranı” medalları, “Maarif əlaçısı” döş nişanı ilə təltif olunmuşdur.
Alı müəllim bu gün də öz bilik və təcrübəsini gənclərdən əsirgəmir, Darvaz orta məktəbində pedaqoji fəaliyyətini davam etdirir. О eyni zamanda Gürcüstan Azərbaycanlı Ziyalılar Cəmiyyətinin Darvaz kəndi üzrə şöbəsinin sədridir.
