Qabil Firdovsi oğlu Bayramov
1985-ci il dekabrın 22-də Zaqatala şəhərində polis ailəsində anadan olmuşdur. 2003-cü ildə Zaqatala şəhər 3 saylı orta məktəbini əla qiymətlərlə bitirmişdir. 2010-cu ildə Qərb Universitetinin Siyasi elmlər fakültəsini “Politologiya” ixtisası üzrə bitirmişdir. O, Xarici İşlər Nazirliyində (XİN) və Azərbaycan Respublikasının Prezidenti yanında Strateji Araşdırmalar Mərkəzində (SAM) təcrübə keçmişdir. 2019-cu ildə Azərbaycan Dövlət İqtisad Universitetini “Maliyyə” ixtisası üzrə bitirmişdir. Həmin ildə Azərbaycan Respublikası Dövlət Statistika Komitəsi və Koreya Statistika Komitəsi (KOSTAT) tərəfindən təşkil edilmiş sosial, iqtisadi statistika və Azərbaycanın Statistik İnformasiya Xidməti (ASİS) sistemi ilə əlaqədar xüsusi kursu bitirmiş və KOSTAT tərəfindən beynəlxalq dərəcəli sertifikat almışdır.
Q.Bayramov 2014-cü ildə Azərbaycan Respublikasının Prezidenti yanında Dövlət Qulluğu Məsələləri üzrə Komissiya tərəfindən keçirilən müsabiqədə müvəffəqiyyət qazanaraq Dövlət Statistika Komitəsi Aparatının Dayanıqlı inkişaf statistikası şöbəsində Aparıcı məsləhətçi vəzifəsinə təyin olunmuş və 2018-ci ilə qədər bu vəzifədə çalışmışdır. Həmin ildə Dövlət imtahan mərkəzi tərəfindən dövlət qulluğu vəzifələri üzrə keçirilən müsabiqənin test imtahanı mərhələsində Respublika birincisi olmuş və müsabiqənin müsahibə mərhələsində müvəffəqiyyət qazanaraq Dövlət Statistika Komitəsi Aparatının Xidmət statistikası şöbəsində Baş məsləhətçi vəzifəsinə təyin edilmişdir. Hal-hazırda həmin vəzifədə çalışır. Dövlət qulluğunun müşaviridir. Evlidir, bir övladı var.
