R.Şahbazov 1983-cü ildə Tbilisi Ali Artilleriya Komandirlər Məktəbinə daxil olmuş, 1987-ci ildə oranı bitirərək xidmətini davam etdirmək üçün SSRİ-nin Almaniyadakı hərbi qrupuna göndərilmişdir. O, 1987-1989-cu illərdə hərbi hissədə qaubitsa artilleriya batareyasının idarəetmə tağımının komandiri, 1989-1991-ci illərdə hərbi hissədə tank əleyhinə tağımın komandiri olmuşdur. Sovet qoşunlarının Almaniyadan çıxarılması ilə əlaqədar olaraq 1991-ci ilin oktyabr ayında Qafqaz hərbi dairəsinə göndərilmiş və 1992-ci ilin aprelinədək Bakıdakı hərbi hissədə BM-21 reaktiv artilleriya batareyasının komandiri olmuşdur.
1992-ci ildən Azərbaycan Ordusunda xidmətini davam etdirən R.Şahbazov hərbi hissədə artilleriya kəşfiyyatının rəisi kimi Kəlbəcərdə erməni qəsbkarlarına qarşı döyüşlərdə iştirak etmişdir. Sonra isə hərbi hissədə divizion komandiri vəzifəsində Goranboy rayonunda gedən döyüşlərin iştirakçısı olmuşdur. 1993-cü ilin mart ayında isə hərbi hissədə əməliyyat bölmə rəisi vəzifəsinə təyin olımmuş və Tərtər, Ağcabədi uğrunda gedən döyüşlərdə fəal iştirak etmişdir.
O, 1995-ci ilin martında Bakı Ali Birləşmiş Komandirlər məktəbində Yerüstü Artilleriya kafedrasına müəllim, 2000-ci ilin avqust ayında isə Ehtiyat Zabit Hazırlığı Kursuna baş müəllim vəzifəsinə təyin olunmuşdur. 2001-ci ilin mart ayında Silahlı Qüvvələrin Təlim və Tədris Mərkəzinin Artilleriya silsiləsinə baş müəllim vəzifəsinə təyin olunmuşdur. Hazırda da Təlim və Tədris Mərkəzinin Artilleriya ixtisas qrupunda baş müəllim kimi xidmətini davam etdirir. Polkovnik-leytenantdır.