Bolnisi rayonunun Darvaz kəndində koronovirusun yayılmasının qarşısının alınması tədbirləri çərçivəsində əhalinin təkrar termoskrininqi keçirilib. Bu barədə məlumatı "Marneuli" radiosu ilə söhbəti zamanı Darvaz kənd sakini və əhalinin termoskrininq olunmasında könüllü çalışan Şükür Əliyev verdi. Onun sözlərinə görə, ilk dəfə kənd həkimləri tərəfindən keçirilən termoskrininq, ikinci dəfə Bolnisi bələdiyyəsinin işçiləri və könüllü qruplar tərəfindən həyata keçirilib. Termoskrininq zamanı hərəsində iki nəfər olmaqla 8 qrup çalışıb.

"Darvaz kəndində hal-hazırda təxminən 800 nəfər yaşayır. Onlardan kənddə olmayanlar da var. Təxminən 755 nəfərə yaxını sakin termoskrininqdən keçdi. Heç birində neqativ hal qeydə alınmadı. Eləcə də Darvaz və ətraf kəndlərdə də əhalinin termoskrininqi keçirilib. Yoxlama zamanı o kəndlərdə də heç bir virus simptomu qeydə alınmayıb", – Şükür Əliyev dedi.

Şükür Əliyev onu da bildirdi ki, Darvaz kəndində termoskrininq keçirən bir qrup işçi daha sonra Dəllər kəndinə də gediblər. Dəllər kəndində isə 45 ailədən analiz götürülüb. Əliyev dedi ki, bir neçə gün öncə Dəllər kəndində bir nəfərdə koronavirus aşkarlanmışdı, amma onun ailə üzvlərində virus qeydə alınmayıb.

Yerli hakimiyyət tərəfindən Darvaz kəndində yaşayan aztəminatlı ailələrə ərzaq yardım da göstərilib.