Gürcüstan vətəndaşlarının hava yolu ilə Azərbaycan Respublikasına səfər etmələrinə icazə verilmişdir.
Bu barədə Azərbaycan Respublikasının baş naziri Əli Əsədov qərar imzalayıb.
Azərbaycan Respublikasının Gürcüstandakı səfirliyinin Gürcüstan vətəndaşlarının Azərbaycana səfəri ilə bağlı yaydığı məlumatda deyilir:
"Azərbaycan Respublikası Nazirlər Kabinetinin 151 saylı, 26 may 2021-ci il tarixli Qərarına edilən dəyişikliyə əsasən, Azərbaycan Respublikası Baş Nazirinin 40 saylı, 15 fevral 2022-ci il tarixli Qərarı ilə tam (iki) doza peyvənd olunan Gürcüstan vətəndaşları cari ilin 15 fevral tarixindən etibarən Azərbaycan Respublikasına hava yolu ilə səfər edə bilirlər. Lakin, Azərbaycan Respublikasına səfər edəcək Gürcüstan vətəndaşları uçuşdan əvvəl 72 saat ərzində alınan COVID-19-a dair PCR testin neqativ nəticəsi haqqında çap olunmuş arayış təqdim etməlidirlər.
1–18 yaş arasında olan şəxslərə münasibətdə – yalnız uçuşdan əvvəl 72 saat ərzində verilmiş COVID-19-a dair PCR testinin neqativ nəticəsini təsdiq edən sənəd əsasında (COVID-19 pasportu tələb olunmur) uçuşlarını həyata keçirə biləcəklər.
Bir yaşdan aşağı olan uşaqlar üçün PCR testi tələb olunmur. Uşağın yaşı gediş tarixində müəyyən edilir", -deyə məlumatda bildirilir.
InterPress.ge
