Sentyabrın 23-də Bolnisi şəhərində ənənəvi "Bolniskalakoba" bayramı (Bolnisi şəhər günü) keçirilib.
Şəhərin qədim və böyük küçələrindən birində açıq hava altında təşkil olunmuş bayram tədbirində Bolnsi şəhəri ilə yanaşı, bələdiyyənin bütün kəndləri üçün ayrılıqda guşələr ayrılıb.
Gürcü xalqı ilə birgə burada Azərbaycan xalqına xas olan qədim milli-mədəniyyət nümunələri və milli mətbəximiz də nümayiş olunub. Tədbirdə çıxış edən Bolnisi meri Davit Şerazadaşvili və Gürcüstan parlamentinin üzvü Qoqi Meşveliani çıxış edərək rayonda son illərdə görülən işlərdən danışıb, bayram münasibəti ilə bolnisililəri təbrik ediblər.
Hər il olduğu kimi, bu il də bələdiyyənin qərarı ilə bir neçə nəfər Bolnisi şəhərinin fəxri vətəndaşlığına layiq görülüb. Bu fəxri titula layiq görülənlərdən biri də əslən Bolnisi bələdiyyəsinin Darvaz kəndindən olan Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğludur.