Tbilisi Sakrebulosunun Təhsil və Mədəniyyət Komissiyasının və Dövlət Dili Departamentinin təşəbbüsü və Sakrebuloda Etnik Azlıqlar Şurasının dəstəyi ilə Beynəlxalq Ana Dili Gününə həsr olunmuş tədbir keçirilib.
Tbilisi Şəhər Şurasında keçirilən tədbirdə ziyalılar, etnik azlıqların nümayəndələri, elm, mədəniyyət xadimləri, ictimai fəallar iştirak ediblər.
Tədbiri Tbilisi Şəhər Şurasının sədri Giorgi Tkemaladze açaraq, Beynəlxalq Ana Dili Günü münasibətilə təbrik edib, ana dilinin qorunması və inkişaf etdirilməsinin əhəmiyyətindən danışıb.
Tədbirdə Ana Dili Günü ilə əlaqədar vətəndaş inteqrasiyasına göstərdikləri xidmətə görə bir sıra şəxslərə mükafatlar təqdim olunub. Onlar arasında Azərbaycan Yazıçılar Birliyinin Gürcüstan bölməsinin rəhbəri, ictimai xadim, yazıçı Rafiq Hümbət də yer alıb.
Tbilisi Şəhər Şurasında keçirilən tədbirdə bildirilib ki, 1999-cu ildən YUNESKO-nun qərarına əsasən, dil və mədəni müxtəlifliyin qorunub saxlanmasına, inkişafına və təqdim olunmasına xidmət edən fevralın 21-i Beynəlxalq Ana Dili Günü kimi təsis edilib.