Gürcüstan azərbaycanlılarının yığcam yaşadıqları Kvemo Kartli-Borçalı bölgəsinin Bolnisi rayonundakı Saraclı kəndində məşhur aşıq Hüseyn Saraclının ənənəvi 27-ci anım günü qeyd olunmuşdur. Mərasim iştirakçıları kənd qəbiristanlığında aşığın məzarını ziyarət etmiş, ustadın 13-cü şagirdi Kövrək Murad ustad ləngərində layiqli ifaları ilə çıxış etmişdir. Sonra mərasim ustadın kəndin mərkəzindəki büstü önündə davam etdirilmişdir. Gürcüstan Aşıqlar Birliyinin sədri Osman Əhmədoğlu ustadın ömür yolu barədə ətraflı danışmışdır. Azərbaycan Aşıqlar Birliyinin katibi Musa Nəbioğlu qurumun rəhbəri, Xalq Şairi Zəlimxan Yaqubun xoş arzularını iştirakçılara çatdırmış, iki ildən sonra 100 illik yubileyi tamam olacaq, türk dünyasının azman sənətkarı Hüseyn Saraclı irsinin gələcək nəslə çatdırılması üçün yeni nəşrlərin hazırlanması istiqamətində tədbirlər planının tərtib edilməsi təşəbbüsü ilə çıxış etmişdir. Gürcüstanın “Şərəf” ordeni kavaleri şair Nizami Saraclı aşıq Hüseynin bir kənd məkanından çıxaraq böyük bir türk eli məkanını belə aşdığını vurğulamış, onun yüksək peşəkarlığından danışmışdır. Tədbirə öz arzusu ilə qoşulmuş Marneuli rayonundakı Sadaxlı 2 nömrəli məktəbin 4-cü sinif şagirdi Canan Məmmədova, Saraclı məktəbinin 7-ci sinif şagirdləri Kənan Çobanov, Elnarə Musayeva, Göyçək Bayramova, Nahadə Çobanova Hüseyn Saraclıya həsr olunmuş şeirləri səsləndirmişlər. Qocaman şairlərdən Bəhram Mehdi, Dünyamalı Kərəm, Saraclı məktəbinin müəllimi Osman Osmanov, jurnalist-tədqiqatçı Mirzə Məmmədoğlu, Gürcüstan parlamentinin sabiq deputatı Hidayət Hüseynli, şairlərdən Zahid Ələmpaşalı, Çoban Rəşid, Şövkət Dağlarqızı və başqaları ustadla bağlı xatirələrindən danışmışlar. Məclis Aşıq Aslan Kosalı, Məhəmməd Sadaxlı, Xan Kamandarın yadigarı Elşad Əfəndiyev, ifaları insanları məftun etmiş Şahbaz Göycəoğlu, gənc aşıq Məsim və başqalarının çıxışları ilə davam etdirilmişdir. Tədbir ustadın həmyerlisi Süleyman Çobanovun təşkilatçılığı ilə baş tutmuş və o, 27 il öncə “Gürcüstan” qəzetinin baş redaktoru Süleyman Əfəndinin təşəbbüsü ilə başlanmış bu mərasimin indiyədək davam etməsindən məmnun olduğunu bildirmiş, Hüseyn Saraclının bir elin deyil, bir dünyanın sənətkarı olduğunu vurğulamışdır. Ustadın yadigarı Əli Hüseynoğlu atasının xatirəsini əziz tutanlara ailəsi adından minnətdarlıq etmişdir.
İslam Əliyev
AzərTAc-ın xüsusi müxbiri Tbilisi