"Avrasiya Beynəlxalq Araşdırmalar İnstitutu" İctimai Birliyi və Gürcüstandakı Azərbaycanlıların Mədəniyyət Mərkəzi “Azərbaycan, Gürcüstan gəncliyinin gözü ilə” adlı ekskursiya təşkil edəcək. Bu haqda Mərkəzin Gənclər şöbəsinin müdiri, Gürcüstan Azərbaycanlı Gəncləri İttifaqının sədr müavini Nərgiz Əliyeva məlumat verib.
O deyib ki, ekskursiya Gürcüstanın və Azərbaycanın müstəqillik günlərinə (26-28 may) Azərbaycanın Respublika Gününə həsr olunub: “Layihə çərçivəsində Azərbaycanın şəhərlərinə və paytaxt Bakıya gürcü gənclərin ekskursiyası baş tutacaq. Həmçinin “Azərbaycan-Gürcüstan münasibətlərinin inkişafında gənclərin yeri və rolu” adlı konfrans və müzakirələr keçiriləcək. Ekskursiyada əsasən gürcü gənclər iştirak edəcəklər. Onlar ictimai həyatda fəallıq göstərən gənclər, jurnalistlər, tələbələrdir. Bu layihənin əsas məqsədi Gürcüstanda yaşayan gəncləri Azərbaycanla yaxından tanış edərək, tariximizi, mədəniyyətimizi onlara göstərməkdir. Layihədə iştirak edən gənclər Gürcüstana qayıtdıqdan sonra Azərbaycan haqqında təəssüratlarını dostları və tanışları arasında paylaşaraq xalqımızın tarixi, mədəniyyəti, təbiəti haqqında müsbət rəy yaradacaqlar.”
Fuad
