Giriş və on üç bölmədən ibarət olan monoqrafiyada xalq şairinin yaradıcılığı müxtəlif aspektlərdən təhlil olunur.
Kitabın redaktoru professor Qəzənfər Paşayev eyni zamanda geniş ön söz də yazıb. “Zəlimxan Yaqubun bağbanı olduğu şeir bağçasına daxil olmaq üçün gərəkdir ki, çağdaş poeziyamızla yanaşı, folklorumuzu, xüsusən də, aşıq yaradıcılığını, Zəlimxanı yetişdirən mühiti yaxşı biləsən”, - deyən Q.Paşayev M.Nəbioğlunu “deyilənlərə cavab verə biləcək tədqiqatçı” kimi dəyərləndirir və kitabı son illərdə Zəlimxan Yaqubun yaradıcılığına həsr olunmuş ən sanballı tədqiqat işi hesab edir: ““Sözün Zəlimxan zirvəsi” əsəri şairin sahilsiz ümmana bənzər yaradıcılıq yoluna işıq tutan tədqiqat işi olmaqla bərabər, Zəlimxan Yaqubun poeziya aləminə uğurlu səyahətdir”.
