Sentyabrın 24-də Tiflisdəki Cümə məscidində bayram namazı qılınıb. Gürcüstanın baş naziri İrakli Qaribaşvili məscidə gedərək bu ölkədə yaşayan müsəlmanları müqəddəs Qurban bayramı münasibətilə təbrik edib.
APA-nın Gürcüstan bürosunun məlumatına görə, İ. Qaribaşvili Gürcüstanın tolerant ölkə olduğunu, bütün dinlərə mənsub insanların ibadətlərini yerinə yetirmələri üçün hər bir şərait yaradıldığını vurğulayıb.
Baş nazir bildirib ki, Gürcüstanda Dini Məsələlər üzrə Dövlət Agentliyi yaradılıb: “Agentliyin yaranmasından sonra hökumət 4 dini icmaya yardım ayırıb. 20-dən artıq məscid bərpa və təmir edilib”.
Tədbirdə Azərbaycan, Türkiyə və İranın Gürcüstandakı səfirləri də iştirak edib.
