APA-nın Gürcüstan bürosunun məlumatına görə, əslən Bolnisinin Zol-Güvəc kəndindən olan şəhid E. Məmmədovun dəfn mərasimində Azərbaycanın Gürcüstandakı səfirliyinin nümayəndələri, Qafqaz Müsəlmanları İdarəsinin Gürcüstan nümayəndəliyinin rəhbəri Hacı Əli Əliyev, Gürcüstan Müsəlmanları İdarəsinin şeyxi Hacı Ramin İgidov, ziyalılar, jurnalistlər,  və kənd sakinləri iştirak ediblər. Dəfn mərasimində din xadimləri “Quran” ayələri, şəhid E. Məmmədovun ruhuna dualar oxuyublar.

 Azərbaycanın Gürcüstandakı səfirliyinin hərbi attaşesi, polkovnik Xəzər Abbasov Azərbaycan Müdafiə Nazirliyi adından başsağlığı verib.

 Şəhid Elşən Məmmədov anadan olduğu Zol-Güvəc kəndinin qəbiristanlığında torpağa tapşırılıb.

 Şəhidin atası, Bolnisinin Zol-Güvəc kəndində yaşayan Vaqif Məmmədov APA-ya açıqlamasında oğlunun əsgəri xidməti başa vurmasına 5 gün qaldığını bildirib: “Elşən İqtisad Universitetini bitirmişdi. Əsgəri xidmətə yola düşəndə anasına demişdi ki, bu yolda ölüm-itim var, şəhid olmaq var. Xidmət etdiyi hissənin komandirləri ondan həmişə razı idilər. Mən dəfələrlə Elşənin görüşünə getmişdim. Qurban bayramı günlərində mənə zəng vurub bayramımızı da təbrik etmişdi. Sentyabrın 25-də isə zəngi gəldi və dedilər ki, oğlunuz şəhid olub. Allah cəmi şəhidlərə rəhmət eləsin, Vətən sağ olsun".

 Xatırladaq ki, 640 balla daxil olduğu Dövlət İqtisad Universitetini keçən il bitirən Elşən Məmmədov sentyabrın 25-də qoşunların təmas xəttində düşmənin Azərbaycan mövqelərinə basqın etməyə cəhd göstərməsi nəticəsində şəhid olub.

  Allah bütün şəhidlərə rəhmət eləsin! Amin!