SOCAR-ın Gürcüstannümayəndəliyinin ofisi qarşısında dinc aksiya keçirilib.
APA-nın Gürcüstan bürosunun məlumatına görə, Gürcüstanın ali məktəblərində təhsil alan azərbaycanlı tələbələr və QHT nümayəndələrinin iştirakı ilə SOCAR-ın nümayəndəliyinin qarşısında “Günəşli” yatağının 10-cu platformasında baş vermiş qəza nəticəsində həyatını itirmiş Azərbaycan neftçilərinin xatirəsi anılıb. Faciədə həlak olanlar bir dəqiqəlik sükutla yad edilib.
Anım mərasimində Azərbaycanlıların Mədəniyyət Mərkəzinin gənclər şöbəsinin müdiri Nərgiz Əliyeva dekabrın 4-də baş verən faciə ilə bağlı ətraflı məlumat verib və həlak olanların ailələrinə, yaxınlarına başsağlığı verib, xəsarət alan neftçilərə şəfa arzulayıb. Tələbələr əllərində "Başın sağ olsun, Azərbaycan!", "Biz həmişə səninləyik!" şüarları tutublar. Onlar əllərindəki gül-çiçək dəstələrini SOCAR-ın binası önünə qoyublar.
Anım mərasiminə qatılan SOCAR-ın Gürcüstan nümayəndəliyinin təmsilçisi tələbələrə minnətdarlığını bildirib.
Qeyd edək ki, Azərbaycandakı matəm günündə Gürcüstan ərazisində fəaliyyət göstərən SOCAR-ın bütün yanacaqdoldurma və qazpaylama məntəqələrində Azərbaycan bayrağı yarıya qədər endirilib.