2016-cı il aprel ayının 13-də Azərbaycan Milli Elmlər Akademiyasının A.Bakıxanov adına Tarix İnstitutunda darvazlı Fəxri Valeh oğlu Hacıyev “Azərbaycan xalqının XIX-XX əsrin əvvəllərində yadelli işğalçılarına və ermənilərin törətdikləri soyqırımı cinayətlərinə qarşı mübarizəsi tarixindən (Borçalı və ətrafındakı bölgələrə aid materiallar əsasında)” adlı doktorluq dissertasiyasını uğurla müdafiə etdi.
AMEA-nın A.Bakıxanov adına Tarix İnstitutunun “Qafqaz tarixi” şöbəsində yerinə yetirilmiş dissertasiyanın elmi məsləhətçisi Əməkdar Elm Xadimi, Dövlət Mükafatı laureatı, AMEA-nın müxbir üzvü Y.Mahmudov, rəsmi opponentlər isə tarixi elmləri doktoru, professorlar K.Şükürov, Q.Əliyev və F.Məmmədovdur.
Müdafiə şurasının üzvləri dissertasiya işinin aktuallığını və yüksək səviyyədə işləndiyini qeyd ediblər. Vurğulanıb ki, dissertasiya işində problem üzrə tarixşünaslıq aşağıdakı istiqamətlərdə ümumiləşdirilmiş və sistemləşdirilmişdir:
bilavasitə qarapapaqların etnik tarixi, mədəniyyəti və yayılma arealına həsr olunmuş tədqiqatlar;
XIX əsrdə Qafqaz uğrunda gedən müharibələr və onların nəticələrinə dair tədqiqatlar;
XX əsrin əvvəllərində Cənubi Qafqazda azərbaycanlılara qarşı ermənilərin soyqırımı cinayətlərinə dair tədqiqatlar.
Doktorluq dissertasiyasını uğurla müdafiə edərək Müdafiə şurası tərəfindən tarix elmləri doktoru elmi dərəcəsi almağa layiq görülən, darvazlı alimlər cərgəsində elmlər doktorlarının sayını artıran ləyaqətli eloğlumuzu bu uğuru münasibəti ilə təbrik edir, şəxsi həyatında və elmi axtarışlarında daha böyük uğurlar arzulayırıq.
Elşad ÇOBANLI
