Azərbaycanın Gürcüstandakı səfiri Dursun Həsənov yeni dərs ilinin başlaması ilə əlaqədar Tbilisidəki Mirzə Fətəli Axundzadə adına 73 saylı orta məktəbə baş çəkib.
Məktəbin direktoru Salman Pirməmmədoğlu məktəbin yeni tədris ilinə tam hazır olduğunu deyib: "Məktəbin 100-dən çox yaşı var. Təhsil ocağının Tbilisidəki məktəblər arasında öz yeri var və həm Azərbaycan, həm də Gürcüstan hökumətinin dəstəyini alır. Bu il məktəb həkim otağı və istilik sistemi ilə təchiz olunub".
Onun sözlərinə görə, bu il məktəbin 18 məzunundan 14-ü ali məktəbə qəbul olub. Direktor bu ilki tədris ilində 1-ci sinfə 17 şagirdin qəbul olunduğunu diqqətə çatdırıb.
Səfir Dursun Həsənov çıxışında məktəbin müəllim kollektivi, şagirdlərə və valideynlərə yeni dərs ilində müvəffəqiyyətlər arzu edib.
Qeyd edək ki, M. F. Axundzadə adına 73 saylı orta məktəb 2010-cu ildə Heydər Əliyev Fondunun “Təhsilə dəstək” layihəsi çərçivəsində əsaslı təmir olunub.
