Bu gün Tiflisdə yerləşən Ermənistan səfirliyinin qarşısında bir qrup azərbaycanlı gənclərin iştirakı ilə etiraz aksiyası keçirilib. GAXA-nın Tiflis müxbirinin məlumatına görə, aksiyada azərbaycanlı gənclər, həmçinin Ermənistanda girovluqda saxlanılan Dilqəm Əsgərovun oğlu Kürdoğlu Əsgərov da iştirak edib. Metronun Marcanaşvili stansiyasindan başlayan etiraz aksiyasının iştirakçıları olan azərbaycanlı gənclər tərəfindən küçə boyu “Dilqəm Əsgərova və Şahbaz Quliyevə azadlıq”, “Əsirlərimizə azadlıq”, “Torpqlarımıza azadlıq”, “Ermənistan işğalçıdır”, “Sarqisyan terroçudur” şüarları şüarları səsləndirilib.

Aksiyaya qoşulan Bavariyadakı Azərbaycan Diaspor Mərkəzinin rəhbəri Akif Məmmədov uca səslə Ermənistan səfirliyi qarşısında “Biz haqqımızı tələb edirik, əsirlərə azadlıq tələb edirik”, deyib. Kürdoğlu Əsgərov isə artıq 4 ildir ki, atasını görmədiyini və onun haqsızlığa düçar olduğunu və atasının heç bir cinayət törətmədiyini, sadəcə olaraq anadan olduğu Kəlbəcər torpağında uyuyan anasının ziyarətinə getdiyini bildirib. O, aksiyanı keçirməkdə yalnız atası Dilqəm Əsgərova və Şahbaz Quliyevə azadlıq tələb etdiklərini bildirib: “Dağlıq Qarabağda təşkil edilən qeyri-qanuni məhkəmə heç bir qanunauyğun deyil. Biz, haqqımızı tələb edir və dünya ictimaiyyətini haqlı tələbimizi dəstəkləməyə çağırırıq. Haqlı tələbimizi digər ölkələrin şəhərlərində də davam etdirəcəyik. Bilirəm, nəhayət, gec, ya tez biz girovluqda olan əzizlərimizi azad edəcəyik,” Kürdoğlu Əsgərov vurğulayıb.

Qeyd edək ki, etiraz aksiyası Tiflis şəhər meriyasının icazəsilə həyata keçirilib. Ermənistan səfirliyinin qarşısına çoxlu sayda polis toplaşaraq, etiraz səslərini ucaldan aksiya iştirakçılarını Ermənistan səfirliyinin binası önünə buraxmayıblar.

Aksiya insidentsiz başa çatıb.

www.gaxa.ge