Aprelin 6-da Gürcüstan ərazisində Tkibulidəki Mindeli kömür mədənində faciəli şəkildə ölən şaxtaçıların ölümü ilə bağlı matəm günü olacaq, həlak olanların şərəfinə bütün inzibati binalarda dövlət bayraqları endiriləcək, kilsə və ibadət yerlərində dualar oxunacaq, faciə qurbanları ehtiramla yad ediləcək. Gürcüstan Azərbaycanlılarının Xəbər Agentliyinin (www.gaxa.ge) məlumatına görə, matəm günü hökumətin qərarı ilə elan edilib. Mədəndə 6 nəfər həlak olub, 3 nəfər isə yaralanıb.
Gürcüstan daxili işlər nazirliyi bildirib ki, baş verən faciə ilə bağlı Gürcüstan Cinayət Məcəlləsinin 240-cı maddəsinin ikinci hissəsinin (dağıntı, tikinti və ya başqa bir işin aparılmasında təhlükəsizlik qaydalarının pozulması, birinin ölümü ilə nəticələnən və ya digər ağır nəticələr baş verən) maddəsi ilə cinayət işi qaldırılıb. Hadisədə baş verən faktlar təsdiq olunarsa və hadisənin törədilməsində təqsirli bilinənlər iki ildən beş ilədək müddətə azadlıqdan məhrumetmə ilə cəzalandırılacaq.
www.gaxa.ge
