Son iki ildə Azərbaycanın 15 vətəndaşı Gürcüstan vətəndaşlığı alıb.
Report agentliyi məlumatı Gürcüstanın Ədliyyə Nazirliyinə istinadən yayıb.
Nazirlik bildirib ki, 2016-cı ilin sentyabrın 16-dan 2018-ci ilin avqustun 17-dək olan dövr ərzində 199 Azərbaycan vətəndaşının Gürcüstan vətəndaşlığına xitam verilib.
Azərbaycanın 1222 vətəndaşı isə Gürcüstanda ikili vətəndaşlıq alıb.
Hesabat dövründə ümumilikdə 15 229 əcnəbiyə Gürcüstan vətəndaşlığı verilib. Onların əksəriyyətini - 6 447 nəfərini Rusiya vətəndaşları təşkil edib. İkili vətəndaşlıq üçün isə 58 143 xarici vətəndaş müraciət edib ki, onların böyük əksəriyyəti 41 631 nəfər olmaqla Rusiya vətəndaşları olub.
Qeyd olunan dövrdə Azərbaycanın 308 vətəndaşı qonşu ölkədə daimi yaşayış icazəsi alıb. Üç Azərbaycan vətəndaşına isə investisiyalar əsasında Gürcüstanda daimi yaşayış izni verilib. Ailəsinə qovuşmaq məqsədilə 144 azərbaycanlı yaşayış icazəsi, 321 Azərbaycan vətəndaşı isə qonşu ölkədə işləmək hüququ əldə edib.
Azərbaycanın 25 vətəndaşına isə təhsil məqsədilə yaşayış izni təqdim olunub.
