Paytaxt Tbilisi şəhərində Azərbaycanın Dövlət Bayrağı gününə həsr olunmuş aksiya keçirilib.
Bir qurup gəncin işdirakı ilə Tbilisidə Heydər Əliyev adına parkda sakinlərə və turistlərə Azərbaycan bayrağının rənglərinin əks olunduğu lentlər paylanılıb. Lenti paylayan gənclər yerli sakin və əcnəbi qonaqlara bu gün Azərbaycan bayrağının 100 illiyinin qeyd olunduğunu bildirərək bayrağın rənglərinin mənaları barədə ətraflı məlumat veriblər.
Gənclər bildiriblər ki, “Azərbaycan bayrağı” aksiyasının məqsədi Azərbaycanın dövlət bayrağını tanıtmaqdır.
Aksiya daha sonra Mirzə Fətəli Axundov adına Azərbaycan Mədəniyyəti Muzeyində davam etdirilib. Gənclər Muzeyin eyvanından Azərbaycan bayrağının rənglərində olan şarları havaya buraxıblar.
Tədbirə Mirzə Fətəli Axundov adına Azərbaycan Mədəniyyəti Muzeyinin əməkdaşları, Tbilisidə yaşayan fəal azərbaycanlı gənclər və Gürcüstanda ali təhsil alan azərbaycanlı tələbələr qoşulublar.
