Yanvarın 22-də Davos Dünya İqtisadi Forumu çərçivəsində Gürcüstanın Baş naziri Mamuka Baxtadze və Azərbaycan Prezidenti İlham Əliyev arasında görüş olub. Bu barədə Baş nazirin mətbuat xidmətindən bildirilib.
Söhbət zamanı Gürcüstan və Azərbaycan arasında strateji tərəfdaşlıq məsələləri, regional əhəmiyyətli birgə nəqliyyat və infrastruktur layihələri, eyni zamanda Davos Forumunda müzakirə olunmuş iqtisadi əlaqələrin dərinləşdirilməsi perspektivləri müzakirə edilib. Tərəflər görüşdə ikitərəfli münasibətlərin bütün əsas istiqamətləri ilə bağlı fikir mübadiləsi aparıblar.
Görüşdə əsas diqqət ticarətin gələcəkdə yüksəldilməsi perspektivlərinə, gürcü və azərbaycanlı iş adamları arasında əlaqələrin fəallaşmasına yönəldilib.
Görüşdə hər iki ölkədə nəqliyyat infrastrukturunun inkişafının vacibliyi vurğulanıb.
Gürcüstanın Baş naziri və Azərbaycan Prezidenti TANAP layihəsi haqında, həmçinin iki ölkənin tranzit potensiyalından daha fəal istifadə edilməsinin vacibliyindən söhbət açıblar. Bu məsələ ilə əlaqədar Bakı-Tiflis-Qars dəmiryolu layihəsinin əsas rolu qeyd edilib.
Görüşdə Gürcüstanın Xarici İşlər Naziri David Zalkaliani və ARDNŞ-in rəhbəri Rövnəq Abdullayev və digər rəsmi şəxslər iştirak edib.
Gaxa.ge
