Gürcüstanda azərbaycanlıların yığcam yaşadıqları Bolnisi rayonunda Ədliyyə Nazirliyi nəzdində Dövlət Xidmətinin İnkişafı Agentliyinin yeni “Ədliyyə Evi” (İcma mərkəzi) istifadəyə verilib.
AZƏRTAC xəbər verir ki, mərkəzin açılış mərasimində Gürcüstan Baş Nazirinin müavini, Ədliyyə naziri Tea Tsulukiani, Kvemo Kartli bölgəsinin qubernatoru Şota Rexviaşvili, Azərbaycanın bu ölkədəki səfiri Dursun Həsənov və digər rəsmi şəxslər iştirak ediblər.
Bildirilib ki, Gürcüstan ərazisində sayca 25-ci olan mərkəzdə yerli sakinlərə dövlət və özəl sektor üzrə 200-dən çox xidmət göstəriləcək.
Ədliyyə Evindən Bolnisi ilə yanaşı, qonşu Dmanisi rayonunun sakinləri də istifadə edə biləcəklər.
Qeyd olunub ki, etnik azlıqların yaşadığı yerlərdə icma mərkəzlərinin inşa edilməsi hökumətin əsas prioritetlərindən biridir. Bu vaxta qədər kəndlərin sakinləri sənədlərin rəsmiləşdirilməsi və dövlət xidmətləri üçün paytaxt Tbilisiyə və digər rayon mərkəzlərinə getməli olurdular. Onların bu problemi artıq öz həllini tapıb.
İcma mərkəzi müasir kitabxana və konfrans zalı ilə də təmin olunub.
Bu cür mərkəzlərin bölgələrdə tikintisi davam etdirilir və yaxın vaxtlarda Qardabani rayonunda da yeni İcma mərkəzi istifadəyə veriləcək.
Nazir Tea Tsulukiani, Dursun Həsənov və digər rəsmi şəxslər rayon sakinlərini təbrik edib, onlara uğurlar arzulayıblar.
Xətayi Əzizov