Bu günlərdə hörmətli eloğlumuz Əli Vəli oğlu Hacıyevin 75 yaşı tamam olur. Dəyərli eloğlumuzu yubileyi münasibəti ilə təbrik edir, ona uzun və sağlıqlı ömür, yeni-yeni uğurlar arzulayırıq.
***
Əli Vəli oğlu Hacıyev 1949-cu ildə Gürcüstanda – Bolnisi rayonunun Darvaz kəndində anadan olub. 1966-cı ildə Darvaz orta məktəbini əla qiymətlərlə bitirib. Həmin ildə Bakıda qəbul imtahanlarını müvəffəqiyyətlə verərək Azərbaycan Xalq Təsərrüfatı İnstitutuna (indiki İqtisad Universiteti) daxil olub.
1970-ci ildə Azərbaycan Dövlət İqtisad İnstitutunun «Sənayenin iqtisadiyyatı» fakultəsini bitirib. İnstitutu bitirdikdən sonra bir müddət laborant vəzifəsində çalışıb, eyni zamanda aspiranturada oxuyub. 1974-cü ildə aspiranturanı bitirib və həmin ildə Azərbaycan Dövlət İqtisad İnstitutunun Elmi şurasında namizədlik (fəlsəfə doktoru) dissertasiyasını müdafiə edib. 1983-cü ildə dosent elmi vəzifəsinin diplomunu alıb.
Ə.Hacıyev 1976-1983-cü illərdə Azərbaycan Dövlət Bədən Tərbiyəsi və İdman Akademiyasında baş müəllim və kafedra müdiri vəzifələrində, 1983-1987-ci illərdə Azərbaycan Texniki Universitetinin «İqtisadi nəzəriyyə» kafedrasında dosent vəzifəsində çalışıb. 1987-ci ildən etibarən yenidən UNEC-də (İqtisad Universitetində) fəaliyyətə başlayıb və müxtəlif dövrlərdə universitetin «Müəssisənin iqtisadiyyatı» kafedrasının dosenti və bu kafedranın müdiri vəzifəsində çalışıb. 2000-2008-ci illərdə UNEC-in «İstehsal və xidmət sahələrinin iqtisadiyyatı» fakultəsinin dekanı, 2009-2014-cü illərdə isə «Marketinq» kafedrasının müdiri olub.
Onun 100-dən artıq elmi məqaləsi, tədris-metodiki və tərcümə olunmuş tədris vəsaitləri dərc olunub.
2019-cu ilin martında dosent Əli Hacıyevə UNEC-in Fəxri Professoru adı verilib, 2020-ci ilə kimi UNEC-in «Müəssisənin iqtisadiyyatı» kafedrasının müdiri vəzifəsində çalışıb.
Hazırda UNEC-in “İqtisadiyyat” kafedrasında elmi-pedaqoji fəaliyyətini davam etdirir.
Azərbaycan Respublikası Prezidentinin 24 sentyabr 2020-ci il tarixli Sərəncamı ilə Azərbaycan Dövlət İqtisad Universitetinin 90 illiyi münasibətilə və Azərbaycanda təhsilin inkişafındakı xidmətlərinə görə Əli Vəli oğlu Hacıyev “Tərəqqi” medalı ilə təltif edilib.